வண்ணச் சிதறல் 41

 

படியா! தடையா !!

“உதவி செய்வதாய் நினைத்து அந்தக் குழந்தையின் தன்னம்பிக்கையை குலைத்து விட்டீர்கள் “ என கடிந்து கொள்கிறார் ஒரு மேல்நாட்டவர்

குதிரை சவாரி செய்து கொண்டிருந்த ஒரு சிறு குழந்தை தவறி விழுந்துவிட பதறிப்போய் தூக்கி விட்டவருக்குத்தான் இந்தக் கடி .

கடிந்தவர் குழந்தையின் தந்தை

ஊட்டியில் பல ஆண்டுகளுக்கு முன் நடந்த இந்த நிகழ்வு பற்றி அத்தா பல முறை சொல்லக் கேட்டிருக்கிறேன் .

பிறர் செய்யும் உதவி நமக்குக் கைகொடுக்கிறதா இல்லை முன்னேற்றத்தை தடுக்கிறதா என்பது ஒரு கேள்வியாகவே இருக்கிறது 

சின்னக் கதை ஒன்று. எல்லோருக்கும் தெரிந்த கதைதான்

ஒரு விவசாயியின் வயல் .

.வயல்பரப்பு முழுதும்  விளைந்து முற்றி அறுவடைக்குகாத்திருக்கும் பயிர்கள்

விவசாயி தன் மனைவி மக்களுடன் வந்து வயலைப் பார்வையிடுகிறார் .

 “என் நண்பர்களை வரச் சொல்லி இருக்கிறேன் . அவர்கள் உதவியுடன் நாளை அறுவடை செய்யத்துவங்கிவிடலாம் “

என்று தம் குடும்பத்தாரிடம் சொல்கிறார்

விளைந்த பயிர்களுக்கிடையில் ஒரு பறவை கூடுகட்டி முட்டையிட்டு குஞ்சு பொறித்து தாய்ப்பறவையும் குஞ்சுகளுமாக வசித்து வருகிறது

விவசாயியின் பேச்சைகேட்டு குஞ்சுகள் திடுக்கிடுகின்றன . “

‘நாம் உடனே வேறு எங்காவது போய்விடலாம் .அறுவடை துவங்கி விட்டால் நமக்கு இங்கு பாதுகாப்பு இல்லை “

என்று தாய்பறவையிடம் சொல்கின்றன . 

தாய் எந்த பதற்றமும் இல்லாமல் “பொறுங்கள் , எனக்குத் தெரியும் எப்போது போவது என்று” என்று சொல்லி குஞ்சுகளை அமைதிப்படுத்துகிறது 

அடுத்த நாள் விவசாயி குடும்பம் வந்து வயலருகே நண்பர்கள் வரவுக்காகக் காத்திருக்கிறது ..நண்பர்கள் யாரும் வரவில்லை. ஏமாற்றமடைந்த விவசாயி தன் மகனிடம் “ நீ போய் நமது உறவினர்களிடம் நாளை வரும்படி  சொல்லிவா . அவர்கள் உதவியுடன் வேலையை துவங்குவோம் “ என்று சொல்லி அனுப்புகிறார்

மீண்டும் பறவைக்குஞ்சுகள் படபடக்க , தாய் அமைதிப்படுத்துகிறது

உறவினர்களுகாகக் காத்திருந்து அடுத்த நாளும் வீணாக விவசாயி “இன்று மாலை நம் அண்டை அயலாரிடம் சொல்லி அவர்களை நாளை வரச்சொல்லி அவர்கள் உதவியோடு  அறுவடைப் பணியை துவங்குவோம் “ என்கிறார்

இப்போது பறவைக்குஞ்சுகளும் பதற்றமில்லாமல் இருக்கின்றன

அடுத்த நாளும் இதே கதைதான் . 

இத்தனை நாள் அமைதி காத்த விவசாயியின் துணைவி வாயைத்திறக்கிறார்

“ இனிமேலும் பிறர் உதவியை எதிர்பார்த்துக் காத்திருந்தால் பயிர் வீணாகிவிடும் . நாளை அதிகாலை நாம் அனைவரும் களத்தில் இறங்க வேண்டியதுதான்  அறுவடையை துவங்க வேண்டியதுதான் “ என்று சொல்ல விவசாயியும் மக்களும் அதுதான் சரி என்று சொல்லுகிறார்கள்

இப்போது தாய்ப்பறவை பரபரப்பாகிறது.

இத்தனை நாளும் பிறர் உதவியை எதிர்பார்த்து காத்திருந்தார்கள் . அதனால் நானும் பொறுமை காத்தேன் . இப்போது அவர்களே பணியில் இறங்க முடிவு செய்து விட்டார்கள். இனி நாம் காத்திருக்க முடியாது

என்று சொல்லி வேறு இடம் தேடப் புறப்படுகிறது.

சிறிய கதை என்றாலும் கருத்துள்ள ஓன்று

பிறர் உதவியை எதிர்பார்ப்பது மட்டுமல்ல .பிறர் உதவியே ஒருவரின் முன்னேற்றத்துக்கு தடைக்கல் என்று மேலாண்மை வல்லுனர்கள்   ஒரு கருத்தை முன்வைக்கிறார்கள்

இந்தக்கருத்து சரியா தவறா என்பது ஒரு பதிலேதும் இல்லாத கேள்வி . மேலாண்மைத் துறையில் அதிலும் குறிப்பாக மனித வளம் பற்றிய கருத்துகளில் சரி தவறு என்று எதுவும் கிடையாது . உண்டென்றால் அது உண்டு இல்லையென்றால் அது இல்லை

 அதிசய மனிதர் திரு ஜி டி நாயுடு தன் கண்டுபிடிப்புகளை ஒரு கண்காட்சியாக கோவையில் வைத்திருக்கிறார் . அதில் பல இடங்களில்

“உன் தாய் தந்தைதான் உன் முதல் எதிரி :”

என்ற அறிவிப்புப் பலகையைப் பார்க்கலாம் . 

மேலோட்டமாக இதைப் பார்த்தால் ஒரு எரிச்சல் யாருக்கும் வரும் . சற்று அமைதியாக ஆழமாக சிந்தித்தால் அதில் முழுதாக இல்லாவிட்டாலும் ஓரளவுக்கு உண்மை இருப்பது புலப்படும்

குறிப்பாக படிப்பு, வேலை என்று வரும்போது பெற்றோர் தம் கருத்துக்களை பிள்ளைகள் மேல் திணிப்பது தொடருகிறது

நான் பஞ்சாப் ஜலந்தரில் பணியாற்றியபோது எங்கள் மகனும் மகளும் பள்ளிக்கு ரிக்சாவில் போய்க்கொண்டிருந்தார்கள். ஊர் ஓரளவு பழகியபின் இருவருக்கும் மிதிவண்டி வாங்கிக் கொடுத்தேன் .

அதை அவர்கள் கண்டுகொள்ளாமல் வழக்கம் போல் ரிக்சாவில் போய் வந்து கொண்டிருந்தார்கள்

ஒரு நாள் ரிக்சாவை நிறுத்தி விட்டேன் ,அடுத்த நாள் முதல் மிதிவண்டியில் பள்ளி  சென்று வந்தார்கள்

உதவி பற்றி பல குறள்கள் இருக்கின்றன .எனக்கு மிகவும் பிடித்தது

உதவி வரைத்தன் றுதவி  வுதவி                                         செயப்பட்டார் சால்பின் வரைத்து (குறள் 105)

இதற்கு பெரிய விளக்கம் தேவையில்லை .வாழ்க்கை கடலில் தத்தளித்துக்கொண்டிருந்த ஒரு சிலர் பிறர் செய்யும் துரும்பு போன்ற சிறிய உதவியைப் பற்றிக்கொண்டு மீண்டு வந்து முன்னேறி காலத்தினால் செய்த நன்றியை மிகப்பெரிதாக எண்ணி வாழ்நாள முழுதும் நன்றி உணர்வோடு இருப்பார்கள்

இதற்கு மாறாக சிலர் பெரிய அளவில் அவர்களுக்கு மற்றவர்கள் உதவினாலும் “ எங்கள் தேவைக்கு இது யானைப்பசிக்கு சோளப்பொறி போல “என்று : பேசிக்கொண்டு என்றும் பிறர் கையை எதிர்பார்த்தே வாழ்வார்கள்

“”இறைவன் உங்களுக்கு உதவியாக இருந்தால் உங்களை வெல்ல யாரால் முடியும் ?

இறைவன் தன் உதவியை நிறுத்திக்கொண்டால் உங்களுக்கு உதவ யாரால் முடியும் ?”.

உதவி பற்றி திரு மறைக்குரானில் இவ்வாறு இறைவன் சொல்கிறான் 

 பல வேறு கருத்துகளைப் பார்த்தோம்

நிறைவாக 

ஒரு சிறிய வேடிக்கை விளயாட்டு

இந்த விளயாட்டுக்கு ஐந்தாறு பேருக்குக் குறையாத ஒரு குழு வேண்டும் . பத்துக்கு மேற்பட்டவர்கள் இருந்தால் இன்னும் சிறப்பாக இருக்கும்

ஒரு அங்குலம் நீளம்,அகலம் ,உயரம் கொண்ட ஒரே அளவிலான மரத்துண்டுகள் இருபதுக்கு மேல்  வேண்டும்

மேசையில்  குவியலாக உள்ள இந்த மரத்துண்டுகளை ஒன்றன் மேல் ஒன்றாக அடுக்க வேண்டும்

கீழே விழாமல் எத்தனை துண்டுகள் அடுக்க முடிகிறதோ அத்தனை மதிப்பெண் கிடைக்கும்

மிக எளிதாகத் தெரிகிறதா :?

இரண்டு சிறிய நிபந்தனைகள்

ஓன்று அடுக்குபவரின் கண்கள் கட்டப்பட்டிருக்கும்

இரண்டு இடது கையால் மட்டுமே அடுக்க வேண்டும்

முதலில் ஒருவர் தனியாக அடுக்க வேண்டும்

அடுத்து அவருக்கு உதவி செய்ய ஒருவர் வருவார் . அவர் கையினால் மரத்துண்டுகளை தொடாமல் வாய்மொழியாக உதவி செய்யவேண்டும்

தனியாக அடுக்கிய மதிப்பெண்களையும் உதவியுடன் அடுக்கிய மதிப்பெண்களையும் குறித்து வைத்துக்கொள்ளுங்கள்

குழுவில் உள்ள அனைவரும் அடுக்கி முடித்தவுடன் மதிப்பெண்களை பாருங்கள்

என்ன தெரிகிறது ?

நீங்களே பார்த்து புரிந்து கொள்ளுங்கள் . முடிந்தால் எனக்கும் அனுப்பி வையுங்கள்

இ(க)டைச்செருகல்

பல்வேறு பணிகள் இருப்பதால் மார்ச் முதல் ஜூன் முடிய எழுத்துப்பணியை  சிறிது ஒத்தி வைக்க வேண்டியிருக்கலாம் .கூடிய மட்டும் என் அட்டவணைப்படி எழுத முயற்சிக்கிறேன்

மூளைக்கு வேலை

இனிமேல் மூளைக்கு வேலை கிடையாது

இறைவன் நாடினால்

 மீண்டும்

சந்திப்போம்

வலைநூல் முகவரி

sherfuddinp.blogspot.com

வசி4103032019sun