அச்சுக்கட்டு

எங்கள் ஊரின் புற(ஊர்)நகர் பகுதி என்று அச்சுக்கட்டைச் சொல்லலாம்

அங்குள்ள திடலில்தான் பெருநாள் கூட்டுத் தொழுகை நடக்கும்

இரண்டு மூன்று கிலோமீட்டர் நடந்துதான் எல்லோரும் போவோம் .பள்ளிப்பருவத்தில் அத்தா , பீயன்னா முனா மாமா ,பிள்ளைகள் எல்லோரும் சேர்ந்து போவோம்

வழியில் அச்சுக்கட்டு(காதர்) மாமா வீடு இருக்கும் அங்கு வயிற்றுக்கும்  மனதுக்கும் இதமான மண் பானைத் தண்ணீர் கொடுப்பார்கள் . மாமா மகன் ஜின்னா கண்களிலேயே அன்பைக்காட்டுவான் . அங்குதான் எல்லோரும்  மருதாணி  வைத்துக் கொள்வார்
கள்.தோட்டத்தில் ஒரு பெரிய அம்மியில் மருதாணி அரைப்பார்கள் 

.

சிறு பிள்ளையாக இருந்த தங்கை சுராஜ் வேண்டாம் வேண்டம் என்று சொல்லியும் மருதாணி வைத்து விட, அச்சத்தில் அலறி உடனே கையை கழுவி விட்டது . இருந்தாலும் மருதாணி கப்பென்று அழகாக பிடித்துக்கொண்டது

பெருமானார் நபி அவர்கள மருதாணி இட்டுக்கொண்டதற்கு சான்று எதுவும் இல்லை என்கிறார்கள் . ஆனால் ஆண்களிடமும் மருதாணி ஒட்டிக்கொண்டது  

    

அச்சுக்கட்டு மாமா மக்கள் சகோதரிகள் நூர், மாமுதாவை எப்போதாவது குடும்ப விழாக்களில் பார்ப்பது உண்டு

தொழுகை நடக்கும் இடத்தில் தென்னை ஓலையில் கொட்டகை போட்டிருக்கும் .சற்று தாமதமாக வருபவர்கள் அந்த ஓலையைப் பிரித்து எடுத்து தரை விரிப்பாக பயன்படுத்துவார்கள்

சுகாதாரத்துக்காக  தூவியிருக்கும் வெளுக்கும் தூள் (ப்ளீச்சிங் பவுடர்  நெடி மூக்கைத் துளைக்கும்  

வண்ண வண்ண குளிர் பானங்கள் , பம்பாய் மிட்டாய் எனப்படும் சவ்வு மிட்டாய்  , பலூன் என நிறைய விற்கும்  

.அதற்கு மேலாக கையேந்துபவர்கள் கூட்டம் துண்டை விரித்துக் காத்திருக்கும் .துண்டு வெறுமனே இருக்கக் கூடாதாம் அவர்களே சில காசுகளை அதில் போட்டு வைப்பார்கள் 

பெண்களுக்குத் தொழுகை கிடையாது . சிறுமிகள் புத்தாடையணிந்து அலங்காரம் செய்து கொண்டு வருவது பார்க்க அழகாக இருக்கும்

பக்கிர்சாக்கள் கொட்டு என்னும் இசைக்கருவியை வைத்து ஒலி எழுப்பி உரத்த குரலில் பாடுவார்கள் (பாவ மன்னிப்பு படத்தில் எல்லோரும் கொண்டாடுவோம் பாட்டில் சிவாஜி கையில் வைத்திருப்பாரே அது போன்ற இசைக்கருவி). முன்பெல்லாம் நோன்பு மாதத்தில் நிறைய பக்கிர்சாக்களைப் பார்ககலாம். அதி காலையில் வீடு வீடாக வந்து தங்கள் பாட்டாலும் கொட்டின் ஒலியாலும் எழுப்பி விடுவார்கள் 

.

நீண்ட அங்கி அணிந்து பெரிய தலைப்பாகையுடன் காணப்படும் பக்கிர்சாக்களைப் பார்த்தால் ஒரு இனம்புரியாத அச்சம் கலந்த உணர்வு  உண்டாகும்

இப்போதெல்லாம் அவர்களைப் பார்க்க முடிவதில்லை  

  

கரீம் அசரத் தொழுகை வைத்து உரையாற்றுவார்.

இட்லி சட்னி சாம்பார் வடைகேசரி  என பலசிற்றுண்டிகளை காலையில் சாப்பிட்டது அப்படியே கண்ணை அசத்தும் . அசரத்தும் அதைப் புரித்து கொண்டு உரையை சுருக்கிக் கொள்வார் (அவருக்கும்தானே அசத்தும்)

 எத்தனையோ நல்லசெய்திகள் அறவுரைகள் எல்லாம் சொல்லியிருக்கிறார் .பொதுவாக மென்மையாகப் பேசும் அவர் சற்று சினத்த குரலில்  ஒரு முறை செல்வந்தர்கள் வீட்டு விருந்துகளில் உள்ள சில குறைகள் பற்றிப் பேசினார் கண்டித்தார்\ .இதெல்லாம் இப்படி  ஒரு கூட்டத்தில்  பேசவேண்டுமா  என்ற எண்ணம் தோன்றியது எனக்கு

தொழுதுவிட்டு திரும்பும்போது கை ஏந்தும் மக்களைத் தாண்டி வருவது சற்று சிரமமாக இருக்கும்.

சின்ன வயதில் எனக்கு கை ஏந்துபவர்களைப்பார்த்தால் எரிச்சல், சினம் வரும்

காலம் கற்றுக்கொடுத்த பாடங்களில் ஓன்று

 கை ஏந்தல்    நம் நாட்டில பலருக்கு  ஒரு பிரிக்க முடியாத ஒழிக்க முடியாத  வாழ்வு முறை :

வண்மை இல்லையோர் வறுமை இன்மையால்  என்பதெல்லாம் காவியக் கற்பனைக் காட்சிகள்தான்

 என்பது

அச்சுக்கட்டு  செல்லும் வழியில் ஒரு வீட்டில் மாதுளம் மரம் அழகாகப் பூத்து நிற்கும் ரசீத் அலி— அத்தா மாமுது அம்பலம் என்ற முகமது அம்பலம் என்ற  வெட்டு நோட்டு அம்பலம் uncle  வீடு. ரசீத் அலி என்னை ஒத்த வயது என நினைக்கிறேன் .நீண்ட நாட்களாய் தொடர்பில் இல்லை (uncle- a convenient  word பெரியத்தாவா சச்சாவா மாமாவா என்ற குழப்பம் வரும்போது ) மாமுது uncle  மகள் சகோதரி ஜலீலா முகநூல் நட்பில் இருக்கிறார்

தொழுதுவிட்டு வீட்டுக்கு வந்தால் வாசலில் நிற்க வைத்து ஆரத்தி எடுப்பார்கள் . கண் பட்டு விடுமாம் . எல்லோருக்குமே தன் குஞ்சு பொன் குஞ்சுதானே .

ஆரத்தி தட்டில் காசு போட வேண்டும்

.வெய்யிலுக்கு இதமாக  சர்பத் ,நொங்கு என்று குளிர்ச்சியாக ஏதாவது இருக்கும் .மதிய உணவு நெய்ச்சோறோ பிரியாணியோ சமையல் ஆகும்வரை உறவினர்களுடன் உரையாடல் சிறிய தூக்கம்  என்று பொழுது போய்விடும்  மாலை  நெருங்கிய சுற்றங்கள் சந்திப்பு . பிறகு நல்ல படம் இருந்தால் போவோம் முதலில் சாம்பியன் என்ற பெயரில் திரைக் கொட்டகை . பிறகு தங்கமணி , மஞ்சுளா ஏன இரண்டு திரையரங்குகள்

கரீம் அசரத்துக்குப்பின் பாருக் ஆலிம்சா . நல்ல குரல் வளம் . மக்களிடையே ஒரு விழிப்புணர்ச்சியை ஏற்படுத்த அவரின் கம்பீரமான குரல் பெரிதும் உதவியது

பாரூக் ஆலிம்சா, கரீம் அசரத் மகன் யஹ்யா அசரத் இருவரும் நாங்கள் புனித ஹஜ் பயணம் போகும்போது வழிகாட்டியாக வந்தார்கள .கரீம் அசரத் பரம்பரையில் ஒரே ஒரு ஆண் குழந்தை மட்டுமே பிறக்கும் என்று சொல்வார்கள்

ஊரில் பெருநாள் தொழுகை தொழுது வெகு நாளாகி விட்டது

இப்போது திடலில் தொழுகை நடக்கிறதா என்பது தெரியவில்லை

காரைக்குடியில் அத்தா நகராட்சி ஆணையராகப்பணியாற்றியபோது பெருநாள் தொழுகை ஒரு திடலில் தொழுக ஏற்பாடு செய்தது . இப்போது கம்பன் மணி மண்டபம் இருக்கும் இடம் என நினைவு . வெறும் சரளைக் கல்லாக இருந்த இடத்தை  சுத்தம் செய்து கொட்டகை போட்டு தண்ணீர் வசதியும் செய்து கொடுத்தது

Power vests with those who exercise it

அதிகாரத்தைப் பயன்படுத்துபவரிடம்தான் அதிகாரம் இருக்கிறது

வணிகர்கள் ஒத்துழைக்கவில்லை அதனால்தான் காய்கனி சந்தையை மூடவில்லை என்று மூக்கால் அழுகிறது தமிழ்நாட்டின் உச்ச அதிகார மையம்       

வேலூரில் அத்தா சில மாதங்களே பணியில் இருந்தது , பெருநாள் தொழுகைக்கு ஒரு திடலுக்குப் போனோம் இடம் தூய்மையாக இல்லை . காலணிகளை முன்னால் வைத்துக்கொண்டு தொழுதார்கள்

வாணியம்பாடியில் பல இடங்களில் தொழுகை நடக்கும் ஒவ்வொரு இடத்துக்கும் தொழுகை நேரத்தில் பத்து நிமிட இடைவெளி இருக்கும் ,ஒருமுறை நீண்ட சுமை தொடரி ஊரை இரண்டாகப் பிரித்துத் தடுப்பது போல் மணிக்கணக்கில் நின்றது இது இயல்பானது அல்ல என்று பர்வலாபப் பேசப்பட்டது

வாணியம்படியில் ஒரு குன்றின் உச்சியில் உள்ள திடலில் ஒரு முறை தொழுகப் போனேன். பெரும்பாலோனோர் காலணிகளைக் கழற்றி தங்கள் முன் வைத்துக்கொண்டு உட்கார்ந்திருந்தார்கள் . .தொழுகை நடத்தும் இமாமும் கையில் காலணியுடன் வந்தது பார்க்க சற்று வேடிக்கையாக இருந்தது. வெளியே கழற்றிப்போட்டு விட்டுத்தான் நான் போனேன் ஒன்றும் ஆகவில்லை

நெல்லையில் பெரிய பெரிய பள்ளிவாசல்கள் இருப்பதால் அங்கேயே தொழுகை நடக்கும் .ஒரு முறை நெல்லை சந்திப்பு பள்ளிக்கு தொழுகப் போயிருந்தோம் . நீண்ட உரைக்குப் பிறகு இன்னும் அரைமணிநேரமாவது இருந்து உரையைக் கேட்டுவிட்டுப் போக வேண்டும் என்று அறிவிப்பு வர அடுத்த நொடியே கல்லெறி பட்ட பறவைக் கூட்டம் போல் அனைவரும் பறந்து போய்விட்டார்கள்

ஜலந்தரில் ஒரேயொரு பழைய  பெரிய பள்ளிவாசல் . அந்த ஊரில்  பித்ரா எனும் தருமப் பணத்தைக்  கொடுக்க ஆள் கிடைக்காமல் தவித்தது ஒரு புதிய அனுபவம் .ரிக்சா ஓட்டுனர்கள் பெரும்பாலும் உத்திரப்பிரதேசத்தைக் சேர்ந்த இசுலாமியர்கள் . அவர்கள் நாங்கள் உழைத்துச் சம்பாதிக்கிறோம் .எங்களுக்கு யாரிடமும் தருமம் வாங்கும் வழக்கம் கிடையாது என்று மறுத்துவிட்டார்கள்.  கேட்கப் பெருமையாக இருந்தது .பின்பு   அவர்கள் சொன்ன ஒரு முதியவர்  குடும்பத்திடம் கொடுத்து வந்தேன்

பல ஆண்டுகளுக்கு முன்புசென்னை கடற்கரையில் தொழுகை நடக்குமாம் ,ஒரே இடத்தில் ஊரே திரண்டு வந்து தொழுவது கண்கொள்ளாக் காட்சியாக இருக்குமாம்

நான் சென்னையில் பணியாற்றியபோது வீட்டுக்கு அருகிலுள்ள ஒரு பள்ளிக்குத் தொழுகப்போனேன் . உரையில் பல மாறுபட்ட கருத்துக்கள் . இன்று எல்லோரும் அழ வேண்டும் என்றார் இமாம் . எனக்கு அழுகை வரவில்லை

இப்போது கடலூரில் நாங்கள் இருக்கும் இடத்துக்கு அருகில் உள்ள சாவடி பள்ளி சிறிய பள்ளிதான் .முத்தவல்லியின் பெரு முயற்சிக்கு இறைவன் செவி சாய்த்து ஒரு விசாலமான  ஈத்கா திடல் அமைந்துள்ளது பள்ளிக்கு ஒரு பெருமை .

இந்த ஆண்டு பெருநாள் கூட்டுத் தொழுகை இல்லை . இதுவும் இறைவன் நாட்டம்தான் .

எங்கும் நிறைந்த இறைவ.னை நாம் இருக்குமிடத்தில் தொழுது கொள்ள வேண்டியதுதான்

சில ஆண்டுகள் முன்பு மதினா நகரில் பெருமழை ஊரெல்லாம் வெள்ளக்காடு .அப்போது பாங்கு எனும் தொழுகை அழைப்பில் உங்கள் இருப்பிடத்திலேயே தொழுது கொள்ளுங்கள் என்று சொன்னது ஒரு அரிய நிகழ்வாக ஊடகங்களில் வலம் வந்தது

இப்போது நம் ஊரில் அதே போல் ஒரு நாளைக்கு ஐந்து வேளையும் ஒலிக்கிறது

இந்த பாங்கு ஒலியையும் தடை செய்ய முயற்சிகள் நடப்பதாய் அவ்வப்போது செய்திகள் வருகின்றன

எது வரை போகுமோ தெரியவில்லை

நூற்றுக்கணக்கான கோடிகளில் இசுலாமியர்கள் கொடுக்கும் தருமங்களை முறைப்படுத்தி  வணிக நோக்கில் இல்லாமல் கல்விக்கூடம் , மருத்துவமனை அமைக்க வேண்டும் என்று நான் பல முறை எழுதியிருக்கிறேன்

அந்தக் கருத்து இப்போது பரவலாக ஊடகங்களில் பலராலும் பேசப்படுகிறது இறைவன் நாடினால் எல்லாம் நல்லபடி அடக்கும்

பசித்திருந்து தனித்திருந்து விழித்திருந்து ஏக இறைவனை வணங்கி வரும்  அனைவருக்கும் புனித ஈகைத் திருநாள் வாழ்த்துகள

எல்லோர் வாழ்விலும் நலம், வளம், மகிழ்ச்சி , நிம்மதி எல்லாம் நிறைந்து நிற்க   இறைவன் அருள் புரிவானாக

இறைவன் நாடினால் மீண்டும் சிந்திப்போம்

25052020mon

sherfuddinp.blogspot.com